ತುಂಗಾವಾಣಿ.
ಕೊಪ್ಪಳ: ‘ಸಾಮಾಜಿಕ ಜಾಲತಾಣಗಳಲ್ಲಿ ಕಂಡದ್ದೆಲ್ಲವೂ ಚಿನ್ನವಲ್ಲ, ಕಣ್ಣಿಗೆ ರಾಚುವ ಜಾಹೀರಾತುಗಳೆಲ್ಲ ನಿಜವಲ್ಲ’ ಎಂದು ಪೊಲೀಸರು, ಬ್ಯಾಂಕಿನವರು ದಿನಬೆಳಗಾದರೆ ಮೈಕ್ ಕಟ್ಟಿ ಬಾಯಿ ಬಡಿದುಕೊಂಡರೂ ಜನರಿಗೆ ಆ ಎಚ್ಚರಿಕೆ ತಲುಪುತ್ತಲೇ ಇಲ್ಲ. ಕಾರಣ ಇಷ್ಟೇ—ಕಷ್ಟಪಡದೆ ರಾತ್ರೋರಾತ್ರಿ ಕೋಟ್ಯಧಿಪತಿಯಾಗುವ ಸುಲಭದ ಆಸೆ ಕಣ್ಣಿಗೆ ಪೊರೆ ಕಟ್ಟಿಸಿಬಿಟ್ಟಿರುತ್ತದೆ. ಇಂಥದ್ದೇ ಆನ್ಲೈನ್ ಖೆಡ್ಡಾಕ್ಕೆ ಬಿದ್ದು ಜಿಲ್ಲೆಯ ಯಲಬುರ್ಗಾ ತಾಲ್ಲೂಕಿನ ಗುತ್ತೂರು ಗ್ರಾಮದ ಧರಿಯಪ್ಪ ಎಂಬ ಯುವಕ ಬರೋಬ್ಬರಿ ₹6.10 ಲಕ್ಷ ಕಳೆದುಕೊಂಡ ಪ್ರಕರಣ ಬೆಳಕಿಗೆ ಬಂದಿದೆ.
ಇನ್ಸ್ಟಾಗ್ರಾಂ ಮಾಯಾಲೋಕ ಮತ್ತು ಬಿಎಸ್ಎನ್ಎಲ್ ಕಥೆ:
ಅಂಗೈಯಲ್ಲೊಂದು ಮೊಬೈಲ್ ಹಿಡಿದು ಇನ್ಸ್ಟಾಗ್ರಾಂ ರೀಲ್ಸ್ ಗುಂಗಿನಲ್ಲಿದ್ದ ಧರಿಯಪ್ಪನಿಗೆ ಹಠಾತ್ತನೆ ಒಂದು ಜಾಹೀರಾತು ಎದುರಾಗಿದೆ. ದೇಶದ ಮೂಲೆ ಮೂಲೆಗಳಲ್ಲಿ ಸರಿಯಾಗಿ ಸಿಗ್ನಲ್ ಸಿಗದ ಸರ್ಕಾರಿ ಸ್ವಾಮ್ಯದ ಬಿಎಸ್ಎನ್ಎಲ್ ಕಂಪನಿಯೇ ತನ್ನ ಊರಿಗೆ, ಅದೂ ತನ್ನ ಜಮೀನಿಗೇ ಬಂದು ಟವರ್ ನೆಡುತ್ತದೆ ಎಂದಿದ್ದಾರೆ. ಅಷ್ಟೇ ಅಲ್ಲ, ಜಮೀನು ಬಿಟ್ಟುಕೊಟ್ಟರೆ ಸಾಕು—ಬರೋಬ್ಬರಿ ₹60 ಲಕ್ಷ ಮುಂಗಡ ಹಣ (ಅಡ್ವಾನ್ಸ್) ಮತ್ತು ತಿಂಗಳಿಗೆ ₹50 ಸಾವಿರ ಬಾಡಿಗೆ! ಇಷ್ಟು ದೊಡ್ಡ ಮೊತ್ತ ಕಣ್ಣಮುಂದೆ ತೇಲುತ್ತಿರುವಾಗ ಲಾಜಿಕ್ ಎಲ್ಲಿಂದ ಕೆಲಸ ಮಾಡಬೇಕು? ಧರಿಯಪ್ಪ ತಡಮಾಡದೆ ಜಾಹೀರಾತಿನಲ್ಲಿದ್ದ ಸಂಖ್ಯೆಗೆ ಕರೆ ಗುದ್ದಿದ್ದಾನೆ.
ಹಂತ ಹಂತವಾಗಿ ಹಣ ಪೀಕಳಾಟ:
ಅತ್ತ ಕಡೆಯಿಂದ ಕರೆ ಎತ್ತಿದ ಖದೀಮ ಎಷ್ಟು ನಯವಾಗಿ ಮಾತನಾಡಿದನೆಂದರೆ, ಧರಿಯಪ್ಪನಿಗೆ ತಾನಿನ್ನು ಸಾಕ್ಷಾತ್ ಕುಬೇರನೇ ಆಗಿಬಿಟ್ಟೆ ಎಂಬ ಭ್ರಮೆ ಹುಟ್ಟಿರಬೇಕು. "ಟವರ್ ಬರುವುದು ಖರೆ ಗೌಡ್ರೆ, ಆದರೆ ಅದಕ್ಕೂ ಮುಂಚೆ ಜಿಎಸ್ಟಿ ಕಟ್ಟಬೇಕು, ರೋಡ್ ಟ್ಯಾಕ್ಸ್ ಕೊಡಬೇಕು, ಜಾಗದ ವ್ಯಾಲ್ಯುಯೇಷನ್ ಫೀಸ್, ಇನ್ಶೂರೆನ್ಸ್ ಪ್ರೀಮಿಯಂ..." ಎಂದು ಒಂದೊಂದೇ ಕಿಲಾಡಿ ರಾಗ ಎಳೆದಿದ್ದಾನೆ. ಕೈಗೆ ಬರಲಿರುವ ₹60 ಲಕ್ಷದ ಲೆಕ್ಕಾಚಾರದಲ್ಲಿದ್ದ ಧರಿಯಪ್ಪ, ಎದುರಿಗಿರುವ ವ್ಯಕ್ತಿ ಯಾರು, ಊರೇನು ಎಂಬ ಕನಿಷ್ಠ ಪರಿವೆಯೂ ಇಲ್ಲದೆ, ವಿವಿಧ ಬ್ಯಾಂಕ್ ಖಾತೆಗಳಿಗೆ ಹಂತ ಹಂತವಾಗಿ ₹6.10 ಲಕ್ಷ ಹಣವನ್ನು ಸುರಿದಿದ್ದಾನೆ.
ಕಡೆಗೆ ಜ್ಞಾನೋದಯ, ಠಾಣೆ ಮೆಟ್ಟಿಲೇರಿದ ಸಂತ್ರಸ್ತ:
ಖಾತೆಯಲ್ಲಿದ್ದ ದುಡ್ಡೆಲ್ಲ ಖಾಲಿಯಾಗಿ, ಅತ್ತ ಕಡೆಯಿಂದ ಫೋನ್ ಸ್ವಿಚ್ಡ್ ಆಫ್ ಆದ ಮೇಲಷ್ಟೇ ಧರಿಯಪ್ಪನಿಗೆ ಅಸಲಿ ಆಟದ ಅರಿವಾಗಿದೆ—ಅತ್ತ ಟವರೂ ಇಲ್ಲ, ಇತ್ತ ಬಾಡಿಗೆಯೂ ಇಲ್ಲ, ಕೈಯಲ್ಲಿದ್ದ ₹6.10.999- ಲಕ್ಷವೂ ಇಲ್ಲ! ಸದ್ಯ ನೊಂದ ಯುವಕ ಸೈಬರ್ ಪೊಲೀಸ್ ಠಾಣೆಗೆ ತೆರಳಿ ದೂರು ನೀಡಿದ್ದು, ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಚುರುಕುಗೊಳಿಸಿದ್ದಾರೆ.
ಆದರೆ, ಮೋಸ ಮಾಡುವವರು ಮಹಾ ಬುದ್ಧಿವಂತರೇನಲ್ಲ; ಅವರು ಜಸ್ಟ್ ಒಂದು ಸುಳ್ಳಿನ ಬಲೆ ಬೀಸಿ ಕುಳಿತಿರುತ್ತಾರೆ. ಆ ಬಲೆಗೆ ತಾವಾಗಿಯೇ ಹೋಗಿ ತಲೆ ತೂರಿಸುವ ಇಂಥ ‘ಆಸೆಯ ಗಿರಾಕಿಗಳು’ ಇರುವವರೆಗೂ ಸೈಬರ್ ಚೋರರ ಧಂದೆಗೆಂದೂ ಮಂದಿ ಕೊರತೆಯಾಗುವುದಿಲ್ಲ ಎಂಬುದಕ್ಕೆ ಈ ಪ್ರಕರಣವೇ ಜ್ವಲಂತ ಸಾಕ್ಷಿ.
ನೈಜ ಸುದ್ದಿಗಾಗಿ ತುಂಗಾವಾಣಿ ಓದಿರಿ.