ತುಂಗಾವಾಣಿ.
ಗಂಗಾವತಿ / ಕುಷ್ಟಗಿ:
ಗಂಗಾವತಿ ತಾಲೂಕಿನ ನಿವಾಸಿಯೊಬ್ಬರು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್ಬಿಐ) ಶಾಖೆಯಲ್ಲಿ ಅಧಿಕಾರ ದುರುಪಯೋಗಪಡಿಸಿಕೊಂಡು ಸರ್ಕಾರ ಹಾಗೂ ಸಾರ್ವಜನಿಕರ ಹಣವನ್ನು ಅಕ್ರಮವಾಗಿ ಲಪಟಾಯಿಸಿರುವ ಗಂಭೀರ ಪ್ರಕರಣ ಬೆಳಕಿಗೆ ಬಂದಿದೆ.
ಗಂಗಾವತಿ ತಾಲೂಕಿನ ವಡ್ಡರಹಟ್ಟಿ ಗ್ರಾಮದ ನಿವಾಸಿ ರಂಗನಾಥ ತಲತೋಟಿ ಆರೋಪಿಯಾಗಿದ್ದು, ಈತನ ವಿರುದ್ಧ ಕುಷ್ಟಗಿ ಪೊಲೀಸ್ ಠಾಣೆಯಲ್ಲಿ ಕ್ರಿಮಿನಲ್ ಪ್ರಕರಣ ದಾಖಲಾಗಿದೆ.
ಖಾಸಗಿ ಖಾತೆಗಳಿಗೆ ಹಣ ವರ್ಗಾವಣೆ:
ಆರೋಪಿ ರಂಗನಾಥ ತಲತೋಟಿ ಕುಷ್ಟಗಿಯ ಮಾರುತಿ ಸರ್ಕಲ್ ಎಸ್ಬಿಐ ಶಾಖೆಯಲ್ಲಿ ಶಾಖಾಧಿಕಾರಿಯಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದ ವೇಳೆ ಕರ್ತವ್ಯಲೋಪ ಹಾಗೂ ನಂಬಿಕೆದ್ರೋಹ ಎಸಗಿದ್ದಾರೆ. 2025ರ ಜುಲೈ 24 ರಿಂದ ಅಕ್ಟೋಬರ್ 21ರ ಅವಧಿಯಲ್ಲಿ ಸರ್ಕಾರದ ಮತ್ತು ಗ್ರಾಹಕರ ಖಾತೆಗಳಿಂದ ನಿಯಮಬಾಹಿರವಾಗಿ ಒಟ್ಟು ₹1,27,994.72 ಹಣವನ್ನು ಕಡಿತ ಮಾಡಿದ್ದರು. ಇದರಲ್ಲಿ ₹13,986.32 ಹಣವನ್ನು ಸರ್ಕಾರದ ಆಂತರಿಕ ಖಾತೆಗೆ ಮರು ಜಮಾ ಮಾಡಿದ್ದರೂ, ಬಾಕಿ ಉಳಿದ ₹1,14,008.40 ಮೊತ್ತವನ್ನು ತನ್ನ, ಪತ್ನಿಯ ಹಾಗೂ ಇತರರ ವೈಯಕ್ತಿಕ ಖಾತೆಗಳಿಗೆ ವರ್ಗಾವಣೆ ಮಾಡಿಕೊಂಡು ವಂಚನೆ ಎಸಗಿರುವುದು
ಲೆಕ್ಕಪರಿಶೋಧನೆಯಲ್ಲಿ ಸಾಬೀತಾಗಿದೆ.
ಅಮಾನತು ಬಳಿಕ ಹಣ ವಾಪಸ್:
ಬ್ಯಾಂಕಿನ ಆಂತರಿಕ ತನಿಖೆಯಲ್ಲಿ ಗೋಲ್ಮಾಲ್ ಬಯಲಾಗುತ್ತಿದ್ದಂತೆ, 2026ರ ಏಪ್ರಿಲ್ 4ರಂದು ಆತನನ್ನು ಸೇವೆಯಿಂದ ಅಮಾನತುಗೊಳಿಸಲಾಗಿತ್ತುತಪ್ಪಿನ ಅರಿವಾದ ಬಳಿಕ ಆರೋಪಿಯು ಏಪ್ರಿಲ್ 30ರಂದು ದುರುಪಯೋಗಪಡಿಸಿಕೊಂಡಿದ್ದ ₹1,14,008.40 ಮೊತ್ತವನ್ನು ಡಿ.ಡಿ. ಮೂಲಕ ಬ್ಯಾಂಕ್ಗೆ ಮರುಪಾವತಿಸಿದ್ದಾನೆ.
ಆದರೆ, ಬ್ಯಾಂಕ್ ಅಧಿಕಾರಿಯ ನಂಬಿಕೆದ್ರೋಹ ಹಾಗೂ ಆರ್ಥಿಕ ಅಕ್ರಮವನ್ನು ಗಂಭೀರವಾಗಿ ಪರಿಗಣಿಸಿದ ಉನ್ನತಾಧಿಕಾರಿಗಳು ಕಠಿಣ ಕಾನೂನು ಕ್ರಮಕ್ಕೆ ಸೂಚನೆ ನೀಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಹೊಸಪೇಟೆ ಮೂಲದ ಬ್ಯಾಂಕ್ ಅಧಿಕಾರಿ ಸೈಯದ್ ಕೆ.ಎಚ್. ಅವರು ನೀಡಿದ ದೂರಿನ ಮೇರೆಗೆ ಕುಷ್ಟಗಿ ಪೊಲೀಸರು ಆರೋಪಿಯ ವಿರುದ್ಧ ಪ್ರಕರಣ ದಾಖಲಿಸಿಕೊಂಡು ಮುಂದಿನ ತನಿಖೆ ಕೈಗೊಂಡಿದ್ದಾರೆ.
ನೈಜ ಸುದ್ದಿಗಾಗಿ ತುಂಗಾವಾಣಿ ಓದಿರಿ.